Լեռնային Ղարաբաղի հակամարտությունը հիշեցում է Եվրոպայում անկայունության մասին. The Guardian
Լեռնային Ղարաբաղի հակամարտությունն ավելորդ հիշեցում է դարձել Եվրոպայում անկայունության մասին, գրում է The Guardian-ը:
Ինչպես նշում է պարբերականը, Եվրամիության ուշադրությունը սևեռված է Սիրիայի պատերազմի, փախստականների ճգնաժամի և ԴԱԻՇ-ի զինյալների կողմից ահաբեկչական սպառնալիքի վրա:
Արնահեղության անսպասելի բռնկումը, որը տեղի ունեցավ Լեռնային Ղարաբաղում, տհաճ ցնցում էր եվրոպացի առաջնորդների համար:
Ինչպես հիշեցնում է թերթը, եվրոպական դիվանագիտության ղեկավար Ֆեդերիկա Մոգերինին միանգամից շտապեց կոչ անել Հայաստանին և Ադրբեջանին հետևել հրադադարի ռեժիմին ու վստահություն ցուցաբերել ԵԱՀԿ հովանու ներքո անցկացվող Մինսկի գործընթացի նկատմամբ:
Նրա խոսքերին միացան նաև ՄԱԿ-ի գլխավոր քարտուղար Պան Գի Մունը և ԱՄՆ պետքարտուղար Ջոն Քերին:
Եվրոպացի առաջնորդներն ամենևին էլ շահագրգռված չեն իրենց սահմանների անմիջական հարևանությամբ հերթական արնահեղությամբ, նշված է հոդվածում:
Հոդվածագրի կարծիքով՝ ամենայն հավանականությամբ, Հայաստանի և Ադրբեջանի հակամարտությունը կարելի է հանդարտեցնել, գոնե որոշ ժամանակով: Սակայն հաշվի առնելով այն, որ հակամարտության ելքից են կախված բազմաթիվ երկրների հետաքրքրություններ, չպլանավորված էսկալացիայի վտանգն ակնհայտ է: Պարբերականը եզրակացնում է, որ բավական բարձր է ռիսկը, որ իրավիճակը դուրս կգա վերահսկողությունից: