«ՀԷՑ-ը լավ ընկերություն է ու երկարաժամկետ ակտիվ, ու մեր ղեկավարմամբ այն անհամեմատ լավը կդառնա». Սամվել Կարապետյան

РБК-ին տված բացառիկ հարցազրույցում «Տաշիր» խմբի հիմնադիր Սամվել Կարապետյանը պատմել է, թե ինչն է իրեն կապում «Գազպրոմի», «Ինտեր ՌԱՕ»-ի հետ, անդրադարձ է կատարվել ՀԷՑ-ին: Գործարարը պատմել է իր ներկայիս անելիքների ու ապագա ծրագրերի մասին

Ներկայացնենք հարցազրույցը՝ մասնակի կրճատումներով:

– Forbes ամսագիրը գրել է, որ Ձեր հաջողության գաղտնիքն այն է, որ դուք ամեն շրջանում գտնում եք հայկական սփյուռքի ազդեցիկ ներկայացուցչի ու նրանց հետ եք վարում գործերը:

– Մեծ մասամբ դա այդպես է, յուրայինների հետ ավելի հեշտ է աշխատել, սակայն գործընկերներին մենք ընտրում ենք հուսալիության սկզբունքով:

– Միևնույն ժամանակ, Դուք բազմաթիվ հետաքրքիր գործընկերներ ունեք նաև ռուս գործարարների շրջանակում: Դուք ունեք «Գեոռեսուրս» ընկերությունը, որի 25%-ը պատկանում է Արտյոմ Չայկային՝ ՀՀ գլխավոր դատախազի ավագ որդուն, դա ճի՞շտ է:

– «Գեոռեսուրս» ընկերության հետ մենք կառուցում ենք «Ռիո» առևտրա-զվարճանքների կենտրոն Յարոսլավսկի մայրուղու հարևանությամբ: Մենք ամբողջությամբ ֆինանսավորում ենք շինարարությունը:

– Արբիտրաժային դատարանի տվյալների բազայում կա վճիռ «Գեոռեսուրսին» տուգանելու համար՝ կապված այն բանի հետ, որ շինարարությունը սկսվել է՝ առանց համապատասխան փաստաթղթերի:

– Ներկայում բոլոր թույլտվությունները ստացվել են:

– Ինչպե՞ս ստեղծվեց Ձեր միությունը Արտյոմ Չայկայի հետ: Նա եկավ Ձեզ մոտ ու ասաց, թե ինքը հող ունի, ու Դուք չէի՞ք ցանկանա դրա վրա կառուցել:

– Ես նրան հարգանքով եմ վերաբերվում, համարում եմ արժանի գործարար, նրա հետ անձամբ ծանոթացել եմ գործարքի կնքումից հետո:

Միտիշչիում նախագծի շուրջ գործընկերություն հաստատելու մասին առաջարկությունը ստացել էր «Տաշիր» թիմը, որը պատասխանատու է բիզնեսի զարգացման համար: Ինչ վերաբերում է պարոն Չայկային, գիտեմ, որ նա հիմա զարգացնում է բազմաթիվ հետաքրքիր նախագծեր ու ակտիվորեն ներդրումներ է կատարում Կալուգայի մարզում:

– Կարծես թե «Գազպրոմն» էլ Ձեր գործընկերների թվում է:

– Այո, ճիշտ է, մենք մասնակցում ենք «Գազպրոմի» շինարարական նախագծերին:

– Կարո՞ղ եք խոշոր նախագծեր անվանել:

– Առանց մեկնաբանությունների:

– Մոսկվայի կառավարության նախագծերում Դուք հաճախ եք մասնակցում: Բավական շատ պատվեր «Իմ փողոցը» ծրագրում ստացավ Ձեր կառույցը՝ «Կասկադը»:

– Քաղաքի բարեկեցության նախագծերում մենք մտադիր ենք հետագայում ևս զարգանալ, ու ոչ միայն՝ Մոսկվայում, այլև՝ այլ շրջաններում: Կա նաև այլ նրբություն՝ այնպես է ստացվել, որ ավանդաբար փողոցների ու ճանապարհների շինարարությամբ հիմնականում զբաղվել են հայերը: Մենք մտադիր ենք պահպանել դա: Ինչ-որ առումով դա կարելի է անվանել «հայկական բիզնես»: Սակայն կարևոր է նաև այլ բան՝ ի՞նչ կերպ ստանալ այդ նախագծերը: Կարող եմ միանշանակ ասել՝ հատուկ արտոնություն ոչ ոք չունի, իրականում դա շատ ծանր ու շատ պատասխանատու աշխատանք է: Գուցե այդ պատճառով հիմա շուկայում քիչ են ընկերություններ, որոնք կարող են աշխատել քաղաքի հետ ու հուսախաբ չանել:

– Դուք ուժե՞ղ եք աճեցրել եք պետպատվերների մասնաբաժինը ձեր նախագծերում:

– Ի՞նչ է ձեր կարծիքով՝ ուժեղը: Այդ ուղղությամբ մենք առաջ ենք շարժվում բավական կայուն ու վստահ:

– Աշնան սկզբին հայտարարվեց, որ Դուք գնում եք «Ինտեր ՌԱՕ»-ից «Հայաստանի էլեկտրական ցանցեր» ընկերությունը: Ձեր ինչի՞ն է պետք այդ ակտիվը, չէ՞ որ այն բազմաթիվ պարտքեր ունի:

– Այո, ընկերությունն ունի պարտքեր, դա կազմում է մոտավորապես 220 մլն դոլար: Ակտիվը գնել ենք այդ պարտքերը փակելու համար:

– Ինչպե՞ս հասկանալ: Դա բարեգործությո՞ւն է:

– Ո՛չ իհարկե, հասկանալի է, որ դա բարեգործություն չէ: «Հայաստանի էլեկտրական ցանցերը» լավ ընկերություն է ու երկարաժամկետ ակտիվ, ու մեր ղեկավարմամբ այն անհամեմատ լավը կդառնա:

– Ինչո՞վ է լավը վնասաբեր ընկերությունը:

– Մենք ընկերությունը ստացել ենք շատ ծանր վիճակում: Այն վնասաբեր էր, սակայն կդառնա շահութաբեր:

– Ինչպե՞ս առաջարկեցին գնել ընկերությունը:

– Առաջարկեցին «Ինտեր ՌԱՕ»-ից:

– Ո՞վ հատկապես,  ընկերության կառավարման խորհրդի նախագահ Բորիս Կովալչո՞ւկը:

– Բնակաբանար, առանց պարոն Կովալչուկի՝ նման ակտիվը չեն վաճառի: Ակտիվի գնման առաջարկով մեզ դիմել էր «Ինտեր ՌԱՕ»-ի կառավարման խորհրդի անդամներից մեկը, սակայն վերջնական որոշում կայացվեց այն բանից հետո, երբ դրա մասին խնդրեցին Հայաստանի իշխանությունները:

– Ձեզ գնման համար կարծես դիմել էին ՀՀ վարչապետ Հովիկ Աբրահամյանն ու նախագահ Սերժ Սարգսյանն այն բանից հետո, երբ Երևանում սկսվեցին էլեկտրաէներգիայի սակագնի բարձրացման դեմ ցույցերը: Նրանք մտավախությո՞ւն ունեին, որ մարդիկ կարող են դուրս գալ վերահսկողությունից:

– Այո, խնդրել են Հայաստանի իշխանությունները: Մի կողմից՝ մենք ցանկանում ենք կարգի բերել ընկերությունը, մյուս կողմից՝ հասկանում ենք, որ դա ռազմավարական ակտիվ է հանրապետության համար, որն ազդում է երկրում ներդրումային կլիմայի վրա: Վստահ եմ, որ մենք կարող ենք այն փոխել:

– Գործարքը գումարայի՞ն էր:

– Այո, մեզ այդ ակտիվը ոչ ոք չի նվիրել:

– Որքա՞ն այն Ձեզ արժեցավ:

– Մենք դեռ չենք բացահայտում գործարքի պայմանները:

– Դուք հիշատակեցիք, որ ընկերությունը Ձեզ բաժին հասավ 220 մլն դոլար պարտքով: Կարելի՞ է իմանալ, թե պարտքերի ո՞ր մասն եք Դուք մարել:

– Շուրջ 20%-ը:

– Դուք տեսե՞լ եք հայկական մամուլի այն ենթադրությունները, թե Դուք գնել եք այդ ակտիվը, որ Ձեր եղբայր Կարեն Կարապետյանը դառնա երկրի վարչապետ:

– Այդ մասին 10 տարի գրում են, սակայն այդ ողջ ժամանակահատվածում նա չի դարձել վարչապետ: Ինչ վերաբերում է «Ինտեր ՌԱՕ»-ին, ապա նա դրա հետ ոչ մի կապ չունի: ՀԷՑ-ի գնումը մենք դիտարկում ենք համալիր՝ որպես բիզնես ու օգնություն հայրենիքին:

– Ինչո՞ւ ՀԷՑ-ը գնեցիք օֆշորային ընկերության միջոցով:

– Ոչ մի տարօրինակ բան դրանում չեմ տեսնում: Ինչ վերաբերում է ՀԷՑ-ի գնմանը, ապա դա կառույցով շատ բարդ միջազգային գործարք էր, ընկերությունը գնում էինք «Ինտեր ՌԱՕ»-ի «դուստր» ընկերությունից: Գործարքի մաքրության ապահովման համար դիմեցինք օֆշորային իրավասության:

– Ընկերության ո՞ր մասնաբաժինն եք գնել:

– Մենք գնել ենք 100%-ը:

– «Ինտեր ՌԱՕ»-ն հաշվետվության մեջ ներկայացնում է 25%-ի վաճառք:

– Համաձայնագրի կառուցվածքն այնպիսին է, որ մասնաբաժինները մեզ գալիս են մի քանի փուլով: Տվյալ պահին մեզ արդեն պատկանում է ակտիվի բաժնետոմսերի 50%-ը:

– Մինչև 2016 թվականի վերջը կունենա՞ք 100% մասնաբաժին:

– Հնարավոր է, ամեն ինչ կախված է մեզնից:

– Ինչպե՞ս եք պլանավորում վաստակել էլեկտրացանցերի հաշվին: Անգամ Ռուսաստանում են էներգետիկները դժգոհում:

– Դա ճիշտ է: Էներգետիկան շատ խոցելի բիզնես է, շատ բան կախված է ոչ միայն՝ կարգավորողներից, այլև՝ սպառողներից: Սակայն Հայաստանում, ինչը զարմանալի է, մարդիկ վճարում են կարգավորված կերպով ու պարբերաբար: Ներկայում էլեկտրաէներգիայի սպառման վճարը բնակչության կողմից կազմում է մոտավորապես 99,8%:

– Եվ այնուամենայնիվ, որտեղի՞ց կառաջանա մարժան:

– Մենք դեռ չենք մտածում մարժայի մասին: Մոտակա 5 տարում հաստատ այդ մասին չենք մտածի: Դա երկարաժամկետ ակտիվ է, ընդմիշտ:

– Դուք աշխատանքի եք նշանակել ՀԷՑ-ում ընկերության նախկին թոփ մենեջեր Կարեն Հարությունյանին: Մի քանի տարի առաջ նրան աշխատանքից հեռացրել էին՝ կապված հահակոռուպցիոն հետաքննության հետ: Ինչո՞ւ որոշեցիք նրան վերադարձնել:

– Տեղեկություններն այն մասին, որ Կարեն Հարությունյանին հեռացրել են կոռուպցիոն նկատառումներով, չեն համապատասխանում իրականությանը: ՀԷՑ-ում նա գլխավոր հաշվապահն էր, հետո տեղափոխվեց «Հայաստանի բարձվոլտային ցանցեր»՝ որպես գլխավոր տնօրենի տեղակալ:

Թարգմանությունը՝ 168.am-ի