«Արաբկիր» բժշկական համալիրի մի խումբ մասնագետներ ժամանել են Ստեփանակերտ
Ստեփանակերտի հանրապետական բժշկական կենտրոնում ԼՂՀ առողջապահության նախարարության և «Մանկական բժիշկների հայկական ասոցացիա» հասարակական կազմակերպության նախաձեռնությամբ կայացել է արդիական մանկաբուժության հարցերին նվիրված կոնֆերանս:
«Արցախպրես»-ի թղթակցի հաղորդմամբ՝ բացման խոսքով միջոցառմանը հանդես է եկել ԼՂՀ առողջապահության նախարարի առաջին տեղակալ Զոյա Լազարյանը, ով , ողջունելով ներկաներին, կարևորել է նման միջոցառումների կազմակերպումը: «Այսօր Արցախում հերթական գիտագործնական միջոցառումն է կազմակերպվում:
Այստեղ են մանկական բժիշկների հայկական ասոցացիայի մի խումբ մասնագետներ, ովքեր Արցախի գործընկեր-մասնագետներին իրենց գիտելիքներն են փոխանցելու- ասել է Զ. Լազարյանը և հավելել,- այս ամենը նպատակ ունի առաջին հերթին օգնել տեղի մասնագետներին՝ ձեռք բերելու համար նոր գիտելիքներ, և , ի շահ Արցախի բնակչության առողջության պահպանման, այն կիրառել աշխատանքում»:
Միջոցառմանը ներկա ԼՂՀ ԱԺ առողջապահության և սոցիալական հարցերի մշտական հանձնաժողովի նախագահ Արամ Գրիգորյանը, իր հերթին ողջունելով կոնֆերանսի մասնակիցներին, նույնպես կարևորել է նման համագործակցությունը և հույս ու վստահություն հայտնել, որ այն շարունակական կլինի:
«Արաբկիր» բժշկական համալիրի մանկական վիրաբույժ-ուրոլոգ, բժշկական գիտությունների դոկտոր պրոֆեսոր, ՀՀ ԱԺ առողջապահության, մայրության և մանկության հարցերի մշտական հանձնաժողովի նախագահ Արա Բաբլոյանն էլ իր խոսքում նշել է, որ վաղը տեղի մանկաբույժների համար կազմակերպվելու է վարպետաց դասեր ու քննարկումներ. կլինեն նաև հիվանդների ընդունելիություն, հետազոտություններ և խորհրդատվություններ:
«Այսօրվա կոնֆերանսի մասնակիցներին կրեդիտ ստանալու համար տրվելու են հավաստագրեր. ովքեր 5 տարվա ընթացքում կհավաքեն 220 կրեդիտ, նրանք կշարունակեն իրենց մասնագիտական գործունեությունը»,-ասել է Ա. Բաբլոյանը:
«Արևիկ» մանկական բուժմիավորման գլխավոր տնօրեն Մեսրոպ Մարգարյանն ընդգծել է , որ Արցախի բժիշկների համար կազմակերպվող նման կոնֆերանսներն շատ կարևոր խթան կհանդիսանան բժիշկների մասնագիտական որակի բարձրացման համար:
Կոնֆերանսին ներկա մի խումբ մասնագետներ ներկայացրել են արդի մանկաբուժության խնդիրները, հանդես եկել տարբեր դասախոսություններով, ներկայացրել Հայաստանի և համաշխարհային բժշկագիտության վերջին տարիների փորձը: Հետո հարցերի շուրջ տեղի է ունեցել ակտիվ, գործնական քննարկումներ: Կոնֆերանսին մասնակցել են «Արևիկ» մանկական հիվանդանոցի բոլոր մասնագետները և Արցախի բոլոր շրջաններից ներկայացուցիչներ:
