Կարմիր խաչի ներկայացուցիչները Բաքվում հանդիպել են հայ ռազմագերի Անդրանիկ Գրիգորյանի հետ
Ադրբեջանական APA լրատվական գործակալության հաղորդմամբ՝ Կարմիր խաչի միջազգային կոմիտեի (ԿԽՄԿ) ադրբեջանական ներկայացուցչության աշխատակիցներն այցելել են հայ ռազմագերի Անդրանիկ Գրիգորյանին, ով ադրբեջանական կողմի մոտ է հայտնվել մարտի 22-ին:
Ինչպես գործակալությանը տեղեկացրել է ԿԽՄԿ-ի Բաքվի ներկայացուցչության հասարակայնության հետ կապերի բաժնի ղեկավար Իլահա Հուսեյնովան, այցը տեղի է ունեցել մի քանի օր առաջ:
Կոմիտեի միջոցով ռազմագերին ու նրա մտերիմները տեղեկություններ են փոխանցել:
Հուսեյնովան նաև հայտնել է, որ ԿԽՄԿ-ն, համապատասխան իր մանդատի, այցելում է ձերբակալվածներին, որպեսզի իրականացնի նրանց պահման վայրերի մոնիթորինգ, ինչպես նաև օգնի կապ պահպանել այդ մարդկանց ու նրանց ընտանիքների միջև:
Հիշեցնենք, որ մարտի 22-ին ԼՂՀ ՊԲ-ն հաղորդագրություն էր տարածել, որ նույն օրը ՊԲ արևելյան ուղղությամբ տեղակայված զորամասերից մեկի մարտական դիրքից, զենք-զինամթերքը թողնելով մարտական հենակետում, հակառակորդի կողմն էր անցել ՊԲ զինծառայող, 1991թ. ծնված շարքային-պայմանագրային Անդրանիկ Գրիգորյանը:
