Արամ mp3-ին ճիշտ է համարում ՀՀ նախագահի հետ բանակցությունների ճանապարհը
Ի տարբերություն նախորդ օրերի` էլեկտրաէներգիայի սակագնի թանկացման այսօրվա բողոքի ակցիա-երթին սկսեցին մասնակցել նաև շոու-բիզնեսի ոլորտի որոշ ներկայացուցիչներ: Ոմանց կարծիքով` պատճառը PR-գովազդային լայն հնարավորությունն էր, ոմանց կարծիքով` քաղաքացիական կեցվածքը, մյուսների կարծիքով` հասարակության առջև հետագայում ամոթով չմնալու խնդիրը:
Ինչևէ, այսօր ամբողջ օրը, միմյանց հերթ չտալով, շոու-բիզնեսի գրեթե բոլոր ներկայացուցիչները սոցիալական ցանցերով` լուսանկարներով և քոմենթներով ազդարարեցին բողոքի ակցիային իրենց միանալու մտադրության մասին:
Քիչ առաջ էլ Բաղրամյան պողոտա եկան «Վիտամին» ակումբի տղաները՝ Արամ mp3-ին, Գարիկ Պապոյանը, Վաչե Թովմասյանը, Տիգրան Գևորգյանը և Արման Խաչատրյանը:
Նրանք լրագրողների հետ զրույցում ասացին, որ իրենք այստեղ են, որպեսզի կենդանի պատնեշ կազմեն մարդկանց և ոստիկանների միջև, որի մասին ֆեյսբուքում հայտարարություն-կոչով հանդես էր եկել ԱԺ պատգամավոր Նիկոլ Փաշինյանը:
«Վիտամին» ակումբի ներկայացուցիչներն ասացին, որ ուզում են, որպեսզի ոչ մի բռնություն չլինի որևէ մեկի նկատմամբ: Արամ mp3-ին ասաց, որ ճիշտ է համարում ՀՀ նախագահի հետ բանակցությունների ճանապարհը: Երեկվա դեպքերիի մասին խոսելով` նրանք ասացին. «Դա ուղղակի ահավոր էր»:
