Քաբուլում խորհրդարանի վրա հարձակման հետևանքով ավելի քան 20 մարդ է տուժել
21 մարդ, ներառյալ 5 կին ու 3 երեխա, վնասվածք է ստացել Քաբուլում այն բանից հետո, երբ «Թալիբան» շարժման զինյալները այսօր գրոհել են Աֆղանստանի խորհրդարանի շենքը, հայտնում է The Guardian-ը:
Պարբերականի տեղեկություններով՝ պատգամավորները տարհանվել են, նրանց շրջանում լրջորեն տուժածներ չկան:
«Խորհրդարանի պատգամավորներն ու ստորին պալատի աշխատակիցները անվտանգության մեջ են: Մենք նրանց դուրս ենք բերել»,-կայքը մեջբերում է Քաբուլի ոստիկանապետ Աբդուրռահման Ռահիմիի խոսքերը:
Նա նշել է, որ ներկայում ընթանում է զինյալներից շրջանն ազատելու օպերացիա:
Ինչպես հաղորդվում է, հարձակումն սկսվել է, երբ մահապարտ ահաբեկիչը իրեն պայթեցրել է խորհրդարանի շենքի մոտ, իսկ հետո զինյալների խումբը զբաղեցրել է մերձակա շինություններից մեկը:
