Երկրորդ համաշխարհային պատերազմը շահել է վրացին. Գարիբաշվիլի
Civil Georgia-ի փոխանցմամբ՝ Վրաստանի վարչապետ Իրակլի Գարիբաշվիլին, մայիսի 9-ին ելույթ ունենալով Եվրոպայում Երկրորդ համաշխարհային պատերազմի ավարտի 70-ամյակին նվիրված միջոցառման ժամանակ, հայտարարել է, որ այդ օրն ավելի յուրահատուկ է դարձնում այն փաստը, որ տվյալ պատերազմը շահել է վրացին:
Գարիբաշվիլին նկատի է ունեցել խորհրդային բռնապետ Իոսիֆ Ստալինին. «Այդ պատերազմը հաղթել է վրացին և դրա համար էլ այն ավելի առանձնահատուկ է»: Գարիբաշվիլին հիշեցրել է, որ ֆաշիզմի դեմ պայքարում զոհվել են 335.000 վրացիներ:
Ներկա դրությամբ Վրաստանում ապրում է Երկրորդ համնաշխարհային պատերազմի մոտ 1800 վետերան: Վրաստանի կառավարությունն այս տարի նրանցից յուրաքանչյուրին Հաղթանակի 70-ամյակի կապակցությամբ շնորհել է 1000 լարի միանվագ օգնություն:
