Ռուսաստանը խախտում է Վրաստանի տարածքային ամբողջականությունը. Կերեսելիձե
Новости-Грузия լրատվական գործակալության փոխանցմամբ՝ Ռուսաստանի ու Ցխինվալի շրջանի դե-ֆակտո իշխանությունների միջև ստորագրված «դաշնակցության ու ինտեգրման մասին» պայմանագիրը խախտում է Վրաստանի տարածքային ամբողջականությունը:
Այս մասին այսօր լրագրողների հետ ճեպազրույցում հայտարարել է Վրաստանի ԱԳՆ-ի խոսնակ Դավիթ Կերեսելիձեն. «Այդ պայմանագրի ստորագրումը Վրաստանի ինքնիշխանության ու տարածքային ամբողջականության դեմ ուղղված քայլ է, ինչպես և Աբխազիայի պարագայում էր: Այն հանդիսանում է օկուպացված Ցխինվալի շրջանի փաստացի բռնակցում»:
Կերեսելիձեն միջազգային հանրությանը կոչ է արել անհրաժեշտ ձևով արձագանքել Ռուսաստանի այդօրինակ գործողություններին: Ռուսաստանը Հարավային Օսիայի հետ այդ պայմանագիրը ստորագրել է ընթացիկ տարվա մարտի 18-ին, իսկ Աբխազիայի հետ՝ 2014 թվականի դեկտեմբերին:
