Մոսկվայում մեկնարկում են միջսիրիական խորհրդակցությունները
Ռուսական ТАСС լրատվական գործակալության փոխանցմամբ՝ այսօր Մոսկվայում մեկնարկում են Սիրիայի ընդդիմադիր խմբերի ներկայացուցիչների խորհրդակցությունները, որոնց ավելի ուշ կմիանա Սիրիայի կառավարության պատվիրակությունը: Հանդիպման նպատակը 2011 թվականից շարունակվող հակամարտության կարգավորման ուղիների փնտրտուքն է:
Մամուլի համար դռնփակ քննարկումներն անցկացվելու են երկու փուլով. հունվարի 26-27-ին տեղի են ունենալու ընդդիմադիր խմբերի ու քաղաքացիական հասարակության հանդիպումները, իսկ հունվարի 28-29-ին՝ Դամասկոսի պատվիրակների մասնակցությամբ խորհրդակցությունները:
Քննարկումները կրելու են բացառապես միջսիրիական բնույթ: Նախատեսված չէ դրանց միջազգային հանրության ներկայացուցիչների մասնակցություն: Բանակցություններին ներկա չի գտնվի նաև ՄԱԿ-ի գլխավոր քարտուղարի՝ Սիրիայի հետ հարցերով հատուկ բանագնաց Ստեֆան դե Միստուրան:
Սակայն չի բացառվում, որ որոշակի փուլում տեղի ունենա ՌԴ ԱԳՆ-ի ներկայացուցիչների հետ հանդիպում, իսկ թե ինչ ձևաչափով, դեռ հայտնի չէ:
