Գյումրիի ռուսական ռազմաբազայում հոգեհանգստի արարողություն է անցկացվել
Ռուսական 102-րդ ռազմաբազայի կայազորային եկեղեցում հունվարի 15-ին հոգեհանգստի արարողություն է անցկացվել՝ ի հիշատակ հունվարի 12-ին Գյումրիում դաժանորեն սպանված Ավետիսյանների ընտանիքի:
Ինչպես տեղեկանում ենք Հայաստանում Համայն Ռուսիո և Մոսկովյան պատրիարքության ներկայացուցչության կայքում տեղադրված հաղորդագրությունից, եկեղեցում հավաքված ռազմաբազայի զինծառայողներին ուղղված խոսքում վանահայր Անդրեյն իր խորը ցավակցությունն է հայտնել անմեղ զոհերի ընտանիքին և ընդգծել. «Չարը ոչ ազգություն, ոչ քաղաքացիություն ունի, որովհետև չարի հայրը սատանան է՝ Աստծո և մարդու թշնամին… Ոչ ոք ավելի լավ չգիտի մարդկային կյանքի գինը, որքան զինծառայողը»:
Հոգեհանգստի արարողություններ են մատուցվել նաև ՌԴ զինված ուժերի Հարավային ռազմական օկրուգի բանակային վանքերի մեծամասնությունում: «Սա բանակային հոգևորականության հոգևոր միասնության վկայությունն էր, որը կիսում է եղբայրական հայ ժողովրդի ցավը»,- ասված է հաղորդագրությունում:
Հունվարի 12-ի վաղ առավոտյան Գյումրիի Մյասնիկյան փողոցի տներից մեկում սպանդի են ենթարկվել Ավետիսյանների ընտանիքի վեց անդամները, ծանր մարմնական վնասվածքներ է հասցվել ընտանիքի յոթ ամսական երեխային։ Սպանության համար մեղադրվում է Գյումրիի ռուսական ռազմաբազայի ժամկետային զինծառայող Վալերի Պերմյակովը, որը ձերբակալվել է ռուս սահմանապահների կողմից՝ հայ-թուրքական սահմանը հատելու փորձ կատարելիս։ Նա պահվում է ռուսական ռազմաբազայի կալանավայրում։ Երևանում և Գյումրիում հունվարի 14-ին և 15-ին տեղի ունեցան բողոքի ակցիաներ՝ Պերմյակովին Հայաստանի իրավազորությանը հանձնելու պահանջով:
Աղբյուրը` civilnet.am:
