Հայաստանի բռնցքամարտի երիտասարդական հավաքականը նոր մարզիչ ունի
Բռնցքամարտի ֆեդերացիայի նախագահ Արթուր Գևորգյանի հրամանով Հայաստանի բռնցքամարտի երիտասարդական հավաքականի ավագ մարզիչ է նշանակվել Կարեն Աղամալյանը՝ փոխարինելով Վազգեն Բադալյանին:
Հայաստանի բռնցքամարտի ֆեդերացիայի հաղորդմամբ, Կարեն Աղամալյանի հետ ռոտացիոն կարգով կնքվել է մեկ տարվա պայմանագիր:
Կարեն Աղամալյանը ծնվել է 1958 թվականի դեկտեմբերի 7-ին: 1999 թվականին արժանացել է ՀՀ վաստակավոր մարզչի կոչման: 2004-2011 թվականներին եղել է բռնցքամարտի Հայաստանի մեծահասակների հավաքականի երկրորդ մարզիչ: 2012-2013 թվականներին գլխավորել է բռնցքամարտի Հայաստանի մեծահասակների հավաքականը: Մարզչական գործունեությունում ցուցադրած արդյունքների համար 2014թ. պարգևատրվել է «Երախտագիտության» մեդալով:
Կարեն Աղամալյանի սաներից 13-ը աշխարհի եւ Եվրոպայի առաջնություններից Հայաստան են բերել տարբեր հարգի մեդալներ: Նրա սաներից են եղել Եվրոպայի կրկնակի չեմպիոն Ազատ Հովհաննիսյանը, Եվրոպայի արծաթե մեդեալակիրներ Ցոլակ Անանիկյանը, Մարատ Թովմասյանը, 2013 թվականի Եվրոպայի բրոնզե մեդալակիր Արամ Ավագյանը:
