Պորոշենկոն ու Մերկելը քննարկել են Դոնբասում տիրող իրավիճակը
Ուկրաինական UNIAN լրատվական գործակալության փոխանցմամբ` Ուկրաինայի նախագահ Պյոտր Պորոշենկոն հեռախոսազրույց է ունեցել Գերմանիայի կանցլեր Անգելա Մերկելի հետ, որի ժամանակ քննարկել է Ուկրաինայի համար միջազգային տնտեսական օգնության հարցը:
Կողմերը համաձայնվել են, որ Արժույթի միջազգային հիմնադրամի (ԱՄՀ) նոր ծրագրի շուտափույթ համաձայնեցումը կօգնի կարգավորել Ուկրաինայում առկա տնտեսական իրավիճակը, ինչպես նաև կնպաստի միջազգային այլ դոնորներից օգնության ստացմանը: Այս մասին հայտնել է Ուկրաինայի նախագահի մամլո ծառայությունը:
Հեռախոսազրույցի ժամանակ Պորոշենկոն ու Մերկելը քննարկել են նաև Դոնբասում տիրող իրավիճակը: Պորոշենկոն հայտնել է 150 ուկրաինացի պատանդի ազատ արձակման մասին, որոնց ներկայումս ցուցաբերվում է անհրաժեշտ օգնություն:
Պորոշենկոն վստահեցրել է, որ Ուկրաինայի իշխանությունները շարունակում են գործադրել բոլոր ջանքերը` մյուս ուկրաինացիներին ազատ արձակելու համար, որոնք շարունակում են մնալ գերության մեջ: Պորոշենկոն հավելել է, որ ուկրաինական հումանիտար օգնության առաջին մասը հաջողությամբ հասել է Դոնբաս:
Պորոշենկոն ու Մերկելն ընդգծել են, որ խնդրի խաղաղ կարգավորման համար բոլոր կողմերը պետք է կատարեն Մինսկյան պայմանավորվածությունների բոլոր կետերը և առաջին հերթին փակեն սահմանն ու դուրս բերեն զորքերը:
