ԱՄՆ պետդեպարտամենտը մտահոգ է Ադրբեջանում «Ազատություն» ռադիոկայանի գրասենյակի փակման կապակցությամբ
Ադրբեջանական Turan լրատվական գործակալության փոխանցմամբ` ԱՄՆ պետդեպարտամենտը չափազանց մտահոգ է այն կապակցությամբ, որ Ադրբեջանի Գլխավոր դատախազությունը փակել է Բաքվում գտնվող «Ազատություն» ռադիոկայանի գրասենյակը:
Այս մասին նշված է ԱՄՆ պետդեպարտամենտի երեկվա հայտարարությունում: Պետդեպարտամենտի ներկայացուցիչը հայտարարել է, որ կան տվյալներ, որ Ադրբեջանի մայրաքաղաքում ձերբակալել ու հարցաքննել են մի շարք լրագրողների: Նա ընդգծել է, որ խուզարկության ու հարցաքննման պատճառներն անհայտ են:
«Ազատություն» ռադիոկայանի գրասենյակի փակումը դատապարտել են նաև ԵԱՀԿ-ի ԶԼՄ-ների ազատության հարցերով ներկայացուցիչ Դունյա Միյատովիչն ու մարդու իրավունքների հարցերով եվրահանձնակատար Նիլս Մույժնիեքսը:
