Ռուսաստանն էլեկտրաէներգիա ու ածուխ կմատակարարի Ուկրաինային. Կոզակ
Россия 24 հեռուստալիքին տված հարցազրույցի ժամանակ Ռուսաստանի փոխվարչապետ Դմիտրի Կոզակը հաստատել է, որ Ռուսաստանը սկսում է էլեկտրաէներգիա ու ածուխ մատակարարել Ուկրաինային: Մոսկվայում հուսով են, որ այդ միջոցները կօգնեն վերականգնել Ղրիմի էներգոմատակարարումը:
Կոզակի խոսքերով` Ռուսաստանն Ուկրաինային էլեկտրաէներգիա կմատակարարի ռուսական ներքին գներով, այսինքն ավելի էժան, քան այն արժե ներուկրաինական շուկայում. «Մենք դա անում ենք միտումնավոր` կապված նրա հետ, որ Խմելնիցկու ատոմակայանում շարքից դուրս է եկել էներգաբլոկներից մեկը»:
Նա հավելել է, որ ռուսական կողմն ամսական մատակարարելու է 500.000 տոննա, և հնարավոր է` մատակարարի ևս 500.000 տոննա, եթե ստորագրվի համապատասխան համաձայնագիր. «Այնսինքն, մենք պատրաստ ենք ընդհանուր առմամբ մինչև մեկ միլիոն տոննա ածուխ մատակարարել Ուկրաինային, որպեսզի նա վերացնի էներգետիկ խնդիրները:
Մեծապես հուսով ենք, որ դա կօգնի լուծել Ղրիմի հուսալի էներգամատակարարման խնդիրը: Մենք այսօր դեռ չենք պայմանավորվել այդ մասին: Դեռ համապատասխան համաձայնագիր չի ստորագրվել Ղրիմի մասին»:
