Վերաքննիչ դատարանը մերժել է Բուդաղյանների փաստաբանի բողոքը
Վերաքննիչ դատարանը երեկ մերժել է Բուդաղյանների փաստաբան Հայկ Ալումյանի բողոքը: Փաստաբանը բողոքարկել էր նախաքննական մարմնի որոշումը, որով այժմ Սյունիքի մարզպետ Սուրիկ Խաչատրյանի օգնական Զարզանդ Նիկողոսյանի նկատմամբ քրեական հետապնդում չի իրականացվել համաներման հիմքով: Նախաքննական մարմինը հաստատված է համարել, որ Սդղի գյոլ կոչվող տարածքից վերադառնալիս Սյունիքի մարզպետ Սուրիկ Խաչատրյանի ավտոմեքենայի մեջ Ավետիք Բուդաղյանին հարվածել է Զարզանդ Նիկողոսյանը, սակայն համաներման կիրառմամբ՝ նրա նկատմամբ քրեական հետապնդում չի իրականացվել: Հայկ Ալումյանի ոսքով՝ իրենք պահանջում են վերացնել այդ որոշումը ոչ թե այն պատճառով, որ Զ. Նիկողոսյանի նկատմամբ համաներում չպետք է կիրառվեր, այլ այն պատճառով, որ «ամեն ինչ սխալ է նկարագրված»:
Հայկ Ալումյանն ասաց, որ վերաքննիչ դատարանի որոշումը բողոքարկելու են վճռաբեկ դատարանում: «Որոշումը դեռ չեմ տեսել, բայց անկախ բովանդակությունից՝ այն իրականության հետ ոչ մի կապ չունի»,- ասաց փաստաբանը:
