Ընդդիմության առաջնորդները փորձել են սպանել ինձ. Յանուկովիչ
Аргументы и факты թերթին տված հարցազրույցի ժամանակ Ուկրաինայի նախկին նախագահ Վիկտոր Յանուկովիչը հայտարարել է, որ երկիրը լքելու որոշումը կապված է եղել նրա հետ, որ ընդդիմության առաջնորդները փորձել են սպանել իրեն.
«Նրանք պարզապես չեն որոշել դա, նրանք դրա համար ձեռնարկել են ամեն բան: Իմ շարասյունը մի քանի անգամ գնդակոծվել է: Անվտանգության աշխատակիցներից մեկը վիրավորվել է: Հենց դրա համար էլ ինձ անհրաժեշտ էր տեղափոխվել այնտեղ, ուր ուժայինները դեռ շարունակում էին հավատարիմ գտնվել երդմանը՝ ենթարկվելով գլխավոր հրամանատարին:
Նրանք ունեին մեկ ելք. գտնել սահմանադրական 4 եղանակներից մեկով ինձ իշխանությունից հեռանցելու տարբերակը: Իմփիչմենթով չստացվեց անել դա: Իրատեսական չէր ինձ անգործունակ ճանաչելը, երբ ես ողջ և առողջ եմ: Մնացել էր ևս երկու եղանակ. կամավոր հրաժարական կամ մահ:
Ընդդիմության առաջնորդները զանգահարեցին ինձ ու համոզում էին հրաժարական տալ: Ես կտրականապես հրաժարվեցի: Դրանից հետո սկսվեցին կոնկրետ գործողությունները, որոնք սպառնալիքներ էին պարունակում ինձ ու ինձ ուղեկցող մարդկանց համար: Իմ ստացած տեղեկատվությունից և որ ամենագլխավորն է՝ մահափորձերի միջոցով ես հստակ հասկացա, որ որոշել են սպանել ինձ»:
