Բաքուն գերբնակեցված է. Ադրբեջանի 9 միլիոն բնակիչներից 4 միլիոնն ապրում է այստեղ. Նարիման Աղաև
Echo.az-ի փոխանցմամբ՝ Բաքուն այսօր գերբնակեցված է. Ադրբեջանի 9 միլիոնանոց բնակչության 4 միլիոնը բաժին է ընկնում Բաքվին: Այս մասին հայտարարել է Կայուն զարգացման հետազոտությունների կենտրոնի նախագահ Նարիման Աղաևը: Նրա խոսքերով՝ Ադրբեջանում կան մի շարք բնակավայրեր, որոնք բնակեցված չեն, իսկ ահա Բաքվի ենթակառուցվածքները նախատեսված են 1-1.5 միլիոն մարդու համար.
«Բանն այն է, որ ֆինանսների ու եկամուտների հիմնական զանգվածը ձևավորվում է Բաքվում: Դրա համար էլ շրջանների բնակչության հիմնական զանգվածն աշխատանք փնտրելու համար գալիս է հենց մայրաքաղաք: Դրա վառ օրինակն է մարդկանց վիթխարի խմբերը, որոնք առավոտյան գնում են աշխատանքի:
Քանի դեռ Բաքվից դուրս բնակվողների համար չեն ստեղծվել բավարար քանակությամբ աշխատատեղեր, այս (Բաքվի գերբնակեցվածության) խնդիրը լուծում չի ստանա: Այսօր շատ կարևոր է երկրի շրջանների տնտեսական զարգացումը, քանի որ շրջաններում սոցիալական զարգացումն արդեն իսկ բավական ցածր է:
Սակայն դեռ ամենահիմնական խնդիրը շարունակում է մնալ աշխատատեղերի ստեղծումը, որպեսզի մարդիկ չձգտեն գալ Բաքու: Ինչ վերաբերում է օտարազգիներին, որոնք բնակվում են մեր քաղաքում, ապա նրանց թիվն այնքան էլ մեծ չէ՝ 10.000 մարդուց էլ պակաս»: