ՌԴ Պետդուման վավերացրել է ԵՏՄ-ին Հայաստանի միանալու մասին պայմանագիրը
Ռուսական ТАСС լրատվական գործակալության փոխանցմամբ՝ ՌԴ Պետդուման վավերացրել է ԵՏՄ-ին Հայաստանի միանալու մասին պայմանագիրը: Պատգամավորներն այդ որոշումն ընդունել են միաձայն:
Պայմանագիրը հոկտեմբերի 10-ին Մինսկում ստորագրել են Հայաստանի, Ռուսաստանի, Ղազախստանի ու Բելառուսի նախագահները: Պայմանագրի համաձայն՝ Հայաստանը ԵՏՄ-ի լիիրավ անդամ է դառնում պայմանագրի ուժի մեջ մտնելուց հետո, այսինքն բոլոր երկրների կողմից վավերացման ընթացակարգերի ավարտից հետո, սակայն 2015 թվականի հունվարի 1-ից ոչ շուտ:
ՌԴ Պետդումայի՝ ԱՊՀ-ի ու եվրասիական ինտեգրման հարցերով հանձնաժողովի ղեկավար Լեոնիդ Սլուցկին Պետդումայի ամբիոնից հայտարարել է, որ Եվրասիական միությանը Հայաստանի միանալը նշանակալից իրադարձություն է ԵՏՄ-ի ստեղծման ճանապարհին՝ ընդգծելով, որ Հայաստանն առավելագույն կամք է ցուցաբերել, որպեսզի գնա զարգացման եվրասիական ուղով:
