Տաթև գյուղի Կենցաղի տան մոտ 22-ամյա երիտասարդի են դանակահարել
Դեկտեմբերի 7-ին, ժամը 17.25-ին, հիվանդանոցից ոստիկանության Գորիսի բաժնում հաղորդում է ստացվել, որ «կրծքավանդակի ձախ ստորին շրջանի կտրած-ծակած վերք» ախտորոշմամբ իրենց մոտ է տեղափոխվել 1992 թ. ծնված Արման Մ.-ն: Վերջինս հայտնել է, որ նշված վնասվածքը ստացել է կոտրած ափսեի վրա ընկնելու հետևանքով:
Ոստիկանության Գորիսի բաժնի ծառայողների ձեռնարկած օպերատիվ-հետախուզական միջոցառումների շնորհիվ պարզվել է, որ Արման Մ.-ն նշված վնասվածքը ստացել է նույն օրը, ժամը 15.00-ի սահմաններում, Տաթև գյուղի Կենցաղի տան մոտ, վիճաբանության ժամանակ, համագյուղացի, 1965 թ. ծնված Կամո Հ.-ի կողմից դանակով հարվածելու հետևանքով: Կամո Հ.-ն հրավիրվել է ոստիկանության Գորիսի բաժին, ներկայացրել հանցագործության գործիք դանակը և տվել խոստովանական բացատրություն:
Նույն օրը բժիշկը տեղեկանք է ներկայացրել, որ Արման Մ.-ի մոտ ախտորոշվել է «որովայնի առաջնային պատի կտրած ծակած վերք թափանցող որովայնի խոռոչ, փայծաղի վիրավորում, ներորովայնային արնահոսություն»: Ըստ բժշկի տեղեկանքի՝ Արման Մ.-ն ի վիճակի չի եղել հաղորդում տալու: Նախապատրաստված նյութերն ուղարկվել են Գորիսի քննչական բաժին:
ՀՀ ոստիկանություն
