Դատական նիստը հետաձգվեց. Հայկ Կյուրեղյանը կրկին ոտքի չկանգնեց
Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում այսօր նշանակված էր Հայկ Կյուրեղյանի գործի քննությունը. նիստը, սակայն, հետաձգվեց, քանի որ դատարան չէր ներկայացել նրա փաստաբանը: Դատավոր Արմեն Բեկթաշյանը հետաձգեց դատական նիստը՝ հաջորդը նշանակելով դեկտեմբերի 17-ին:
Նշենք, որ ինչպես նախորդ, այնպես էլ այս դատական նիստի ժամանակ ամբաստանյալ Հայկ Կյուրեղյանը ոտքի չկանգնեց, երբ ներս էր մտնում դատավորը: Վերջինս բացատրեց դատական նիստի կարգը, ինչպես նաև նշեց, թե դատարանի կողմից ինչ սանկցիաներ կարող են կիրառվել:
Դատարանը նշեց, թե քանի որ ամբաստանյալը խախտել է կարգը, նրա նկատմամբ նախազգուշացում է կիրառվում և նշեց, որ կրկնվելու դեպքում կարող են կիրառել օրենսգրքով սահմանված այլ սանկցիաներ:
Հայկ Կյուրեղյանը կրկին հրաժարվեց կանգնել՝ միևնույն ժամանակ նշելով, որ ցանկություն ունի հրաժարվելու պաշտպանից: Դատավորն էլ բացատրեց, որ Քրեական դատավարության օրենսգրքի համաձայն՝ պաշտպանից հրաժարվելը քրեական վարույթն իրականացնող մարմինն ընդունում է միայն այն դեպքում, եթե կասկածյալի կամ մեղադրյաի կողմից դրա մասին հայտնվել է սեփական նախաձեռնությամբ, կամավոր պաշտպանի ներկայությամբ: Միևնույն ժամանակ դատավորն ասաց, որ եթե երեք նիստ շարունակ պաշտպանն անհարգելի պատճառով չներկայանա նիստերին, դատարանը կանդրադառնա դրան:
Նշենք, որ դատարանում չկանգնելը Հայկ Կյուրեղյանը բացատրել էր նրանով, որ դատարանը համարում է ինքնակոչ կառավարության դատարան, որը ենթարկվում է կառավարությանը, նրա խամաճիկն է: Նա նշել էր, որ դա ռեժիմի դատարանն է, դատարաններում 90 տոկոսում տեսել է ոչ թե արդարադատության իրականացում, այլ արդարության բռնաբարում. «Այս մարմինն րդարադատություն իրականացնող մարմին չէ, դրա համար ես չեմ հարգում այս մարմինը»:
