ՆԱՏՕ-ն չունի Ուկրաինային զենք մատակարարելու հնարավորություն. Սթոլթենբերգ
Ռուսական ТАСС լրատվական գործակալության փոխանցմամբ՝ ՆԱՏՕ-ն չունի Ուկրաինային զենք մատակարարելու հնարավորություն: Այս մասին Բրյուսելում լրագրողների հետ զրույցում հայտարարել է ՆԱՏՕ-ի գլխավոր քարտուղար Յենս Սթոլթենբերգը.
«ՆԱՏՕ-ն ճգնաժամի մեկնարկից ուժեղ աջակցություն է ցուցաբերել Ուկրաինային: Մենք հաստատել ենք նպատակային հիմնադրամներ, որոնց գործարկելու ենք դեկտեմբերի 2-ին: Ինչ վերաբերում է ռազմական սարքավորմանը, ապա ճիշտ կլինի, որ յուրաքանչյուր դաշնակից երկկողմ հարաբերությունների հիման վրա ինքը որոշի այդ հարցը»:
Սթոլթենբերգը հավելել է, որ ՆԱՏՕ-ն չի կարող երաշխավորել, որ մոտ ապագայում դաշինքը չի ընդլայնվի. «Յուրաքանչյուր երկիր ինքն է որոշում, թե ինչպես ապահովի իր անվտանգությունը: Մեր քաղաքականության հիմքում ընկած է բաց դռների սկզբունքը»: Դեկտեմբերի 2-3-ին Բրյուսելում տեղի է ունենալու ՆԱՏՕ-ի երկրների արտգործնախարարների հանդիպումը:
