Վլադիմիր Պուտինը ժամանել է Անկարա
Թուրքական Anadolu լրատվական գործակալության փոխանցմամբ՝ Ռուսաստանի նախագահ Վլադիմիր Պուտինը ժամանել է Անկարա: Դրա հետ կապված՝ Թուրքիայում ձեռնարկել են անվտանգության խստացված միջոցառումներ: Պուտինի ինքնաթիռն Անկարայի «Էսենբողա» օդանավակայանում վայրէջք է կատարել տեղական ժամանակով ժամը 13.08-ին:
Պուտինն օդանավակայանից ուղևորվելու է Անըթքաբիր՝ Աթաթուրքի դամբարան, ինչից հետո «տետ-ա-տետ» ձևաչափով հանդիպում է ունենալու Թուրքիայի նախագահ Ռեջեփ Էրդողանի հետ: Ավելի ուշ Պուտինն ու Էրդողանը համանախագահելու են Ռուս-թուրքական բարձր մակարդակի համագործակցության խորհրդի 5-րդ նիստում:
Պուտինի հետ «տետ-ա-տետ» հանդիպում է ունենալու նաև Թուրքիայի վարչապետ Ահմեթ Դավութօղլուն: Երեկոյան ընթրիքից հետո Պուտինը կլքի Թուրքիան:
