Ֆերգյուսոնի ոստիկանությունը կհամալրվի աֆրոամերիկացիներով
Ամերիկյան The Los Angeles Times թերթի փոխանցմամբ՝ ԱՄՆ Միսսուրի նահանգի Ֆերգյուսոն քաղաքի ոստիկանությանը սպասվում են կադրային փոփոխություններ, որոնք առաջին հերթին առնչվելու են իրավապահ մարմիններում աֆրոամերիկացիների թվաքանակին: Այս մասին հայտարարել է Ֆերգյուսոնի քաղաքապետ Ջեյմս Նոուլզը:
Նա ընդգծել է, որ ոստիկանության հաստիքային ձևավորման հանդեպ նոր մոտեցումը պետք է հենված լինի հասարակության կազմի վրա: Նա հավելել է, որ դրա համար մտադիր է իրավապահ մարմինների շարքերում ընդգրկել աֆրոամերիկացիների:
Դրա հետ մեկտեղ նա նշել է, որ քաղաքի ոստիկանական դեպարտամենտի ղեկավարությունում չեն լինի պաշտոնանկություններ: Նոյեմբերի 29-ին ոստւկան Դարեն Ուիլսոնը, ով օգոստոսի 9-ին Ֆերգյուսոնում սպանել է 18-ամյա աֆրոամերիկացի Մայքլ Բրաունին, հրաժարականի դիմում էր գրել:
