Յուրի Վարդանյանը՝ նոր էթիկետի հիմնադիր. «Հրապարակ»
«Հրապարակ» թերթն իր այսօրվա համարում գրում է. «Վրաստանում ՀՀ դեսպան Յուրի Վարդանյանը խոստանում է դառնալ դիվանագիտական նոր էթիկետի հիմնադիր: Դիվանագիտական աշխարհում ընդունված չէ հանգստյան եւ տոնական օրերին ընդունելություններ կազմակերպել՝ կիրակին անձեռնմխելի օր է, սակայն մեր դեսպանը ՀՀ անկախության օրվան նվիրված ընդունելությունը կազմակերպել է կիրակի օրը:
Եթե նախկինում այդ օրը նշել են հատուկ վարձված դահլիճում, ապա այս տարի ընդունելությունը կայացել է դեսպանի համար վարձված առանձնատանը: Ուշագրավ է նաեւ, որ մասնակցել են բացառապես հայեր՝ Վրաստանից, ինչպես եւ Հայաստանից ժամանած: Մասնակիցներից մեկը նկատեց. «Անցած տարի միայն վրացի չորս նախարար կար, պետնախարար, բազմաթիվ օտարերկրյա դիվանագետներ»:
Բայց ամենահետաքրքիրն այն է, որ երբ Յուրի Վարդանյանը ներս է մտել, մարդիկ դիմավորել են ծափերով, նա կրկին հիշել է իր չեմպիոնական անցյալը. «Երբ ես ծանրաձողին էի մոտենում, ավելի բուռն ծափերով էին ինձ ողջունում»:
Ամբողջությամբ կարող եք կարդալ «Հրապարակ» թերթի այսօրվա համարում:
