Էրդողանն այսօր կժամանի Ադրբեջան
Ադրբեջանական Turan լրատվական գործակալության փոխանցմամբ՝ Թուրքիայի նախագահ Ռեջեփ Էրդողանն Ադրբեջանի նախագահ Իլհամ Ալիևի հրավերով սեպտեմբերի 2-3-ին պաշտոնական այցով ժամանում է Բաքու: Այս մասին նշված է Թուրքիայի նախագահի կայքում:
Էրդողանի վարչակազմի հաղորդմամբ՝ այցի ընթացքում երկու երկրների նախագահները քննարկելու են թուրք-ադրբեջանական հարաբերությունների տարբեր ասպեկտներ, տարածաշրջանային ու միջազգային այժմեական խնդիրներ և համատեղ նախագծերի իրագործման հարցը:
Ադրբեջանից Էրդողանը մեկնելու է Մեծ Բրիտանիա, ուր (Ուելսում) սեպտեմբերի 4-5-ին տեղի է ունենալու ՆԱՏՕ-ի գագաթաժողովը: Սեպտեմբերի 1-ին էլ Էրդողանն այցելել էր ինքնահռչակ Հյուսիսային Կիպրոսի թուրքական հանրապետություն:
Հիշեցնենք, որ սրանից առաջ փորձագետ Քաբիլ Հուսեյնլին հայտարարել էր, որ Էրդողանի այցի ժամանակ բարձրացվելու է Նախիջևանում թուրքական ռազմաբազայի ստեղծման հարցը:
