Նոր կառավարության նպատակը լինելու է նոր սահմանադրություն ընդունելը. Դավութօղլու
Ռուսական ИТАР-ТАСС լրատվական գործակալության փոխանցմամբ՝ Թուրքիայի արտգործնախարար, իշխող «Արդարություն ու զարգացում» կուսակցության (ԱԶԿ) նախագահի ու երկրի վարչապետի թեկնածու Ահմեթ Դավութօղլուն ԱԶԿ-ի մեծ համագումարի ժամանակ հայտարարել է, որ երկիրը մտադիր է 2015 թվականին ավարտել նոր Սահմանադրության վրա աշխատանքները.
«Ժողովրդավարության ուղղությամբ հետագա առաջխաղացման համար անհրաժեշտ է նոր Սահմանադրություն, որը նոր դռներ կբացի Թուրքիայի առջև: Հուսով եմ, որ 2015 թվականի խորհրդարանական ընտրությունների արդյունքներով մենք կստանանք մեծամասնություն, ինչն անհրաժեշտ է նոր Սահմանադրություն ընդունելու համար:
Նոր Սահմանադրության վրա աշխատանքներ են տարվում արդեն մեկ տարուց ավելի: Սակայն ընդդիմության դեմարշների պատճառով դրա վերջնական տարբերակը դեռ պատրաստ չէ՝ հանրաքվեի դրվելու համար: Նոր Սահմանադրության մշակումը ԱԶԿ-ի առանցքային նպատակներից մեկն է»:
Դավութօղլուն կարևորել է նաև գյուլենականների («զուգահեռ կառույցի») դեմ պայքարը՝ հավելով, որ այդ կառույցը ցանկանում է ոչնչացնել պետությունը, սակայն իրենք թույլ չեն տա դա:
