Սիրիայում երկու տարվա գերությունից հետո ազատ են արձակել ամերիկացի լրագրողի
Al Jazeera հեռուստաալիքի փոխանցմամբ՝ ամերիկացի լրագրող Փիթեր Տեո Կերտիսը Սիրիայի զինյալների մոտ երկու տարի գերի մնալուց հետո ազատ է արձակել:
Հեռուստաալիքի տվյալներով, Կերտիսին ազատ արձակելը հնարավոր է դարձել կատարցի բանագնացների միջնորդության շնորհիվ: Ազատ արձակվելուց հետո ամերիկացի լրագրողին հանձնել են ՄԱԿ-ի ներկայացուցիչներին:
Հեռուստաալիքի տրամադրության տակ է հայտնվել մի տեսանյութ, որում Կերտիսը պատմում է, որ գերության ժամանակ ստացել է ամեն անհրաժեշտ բան, այդ թվում նաև սնունդ ու հագուստ:
Սիրիայի զինյալները Կերտիսին առևանգել էին 2012 թվականի հոկտեմբերին Թուրքիայի հարավում: Նրան ազատելու մասին տեղեկատվությունը հաստատել է ՄԱԿ-ի մամլո ծառայությունը: Կերտիսի ազատման լուրը հաստատել է նաև ԱՄՆ պետքարտուղար Ջոն Քերին, որի խոսքերով՝ Կերտիսն այժմ վերադառնում է տուն:
