Ռուսաստանի ներկայացուցիչները չեն մասնակցի Ուելսում կայանալիք ՆԱՏՕ-ի գագաթաժողովին
Ռուսական Коммерсантъ թերթի փոխանցմամբ՝ ռուս դիվանագետները հրավեր չեն ստացել սեպտեմբերին կայանալիք ՆԱՏՕ-ի գագաթաժողովին, որում քննարկվելու են Ռուսաստանի հետ դաշինքի հարաբերությունները: Այս մասին թերթին հայտնել են դիվանագիտական շրջանակներում ու ՆԱՏՕ-ի շտաբ-բնակարանում նրա աղբյուրները:
ՆԱՏՕ-ի գագաթաժողովն անցկացվելու է սեպտեմբերի 4-5-ին, Ուելսում: Ի թիվս այլ հարցերի, քննարկվելու են նաև հավաքական պաշտպանության ուժեղացման հարցում ՆԱՏՕ-ի պատրաստակամությունը, ռազմական ծախսերի մեծացումը, Ռուսաստանի հետ հարաբերություններն ու Ուկրաինայի հետ կապերի ամրապնդումը, ինչպես նաև Աֆղանստանից զորքերի դուրս բերման հարցը:
Թեև առանցքային բոլոր թեմաներն այս կամ այն չափով կապաված են Ռուսաստանի հետ, ռուս դիվանագետները չեն գտնվի Ուելսում: ՆԱՏՕ-ի շտաբ-բնակարանում առկա աղբյուրները հայտարարել են, որ սեպտեմբերյան գագաթաժողովին ռուսական պատվիրակության մասնակցությունը նպատակահարմար չէ:
