Նախիջևանի ղեկավարն ընդունել է Վրաստանի, Թուրքիայի ու Ադրբեջանի պաշտպանության նախարարներին
Ադրբեջանական Turan լրատվական գործակալության փոխանցմամբ` Նախիջևանի ինքնավար հանրապետության Գերագույն մեջլիսի ղեկավար Վասիֆ Թալիբովն այսօր ընդունել է ինքնավարությունում գտնվող Վրաստանի, Թուրքիայի ու Ադրբեջանի պաշտպանության նախարարներ Իրակլի Ալասանիային, Իսմեթ Յըլմազին ու Զաքիր Հասանովին:
Հանդիպման ժամանակ ընդգծվել է Վրաստանի ու Թուրքիայի հետ կրթական, առողջապահական, տնտեսական ու տրանսպորտային ոլորտներում հաջող համագործակցությունը:
Հասանովը հայտարարել է, որ նախիջևանյան հանդիպումը նոր հնարավորություններ է բացում երեք երկրների միջև համագործակցության համար: Իսմեթ Յըլմազն իր հերթին ընդգծել է Թուրքիայի ու Նախիջևանի միջև կապերի զարգացման կարևորությունը` ընդգծելով 1921 թվականին ստորագրված Մոսկվայի ու Կարսի պայմանագրերի նշանակությունը:
Յըլմազն աջակցություն է հայտնել Ադրբեջանի տարածքային ամբողջականությանն ու այդ երկրի հետ ռազմական համագործակցության խորացմանը: Ալասանիան էլ երեք երկրների միջև հարաբերությունները որակել է որպես ռազմավարական գործընկերություն:
Նա ընդգծել է ռազմական համագործակցության կարևոր դերը տարածաշրջանային խաղաղությանը հասնելու գործում: Կողմերը քննարկել են նաև տարածաշրջանի ռազմա-քաղաքական իրավիճակն ու փոխադարձ հետաքրքրության կենտրոնում ընկած այլ հարցեր:
