Պենտագոնը ցանկանում է գնել ռուսական ուղղաթիռներ
Ռուսական РИА Новости լրատվական գործակալության փոխանցմամբ՝ չնայած ԱՄՆ Կոնգրեսի բողոքներին՝ Պենտագոնը շարունակում է համառորեն պնդել ռուսական ուղղաթիռներ գնելու անհրաժեշտության մասին՝ Աֆղանստանում առաքելություն իրականացնելու համար: Այս մասին այսօր հայատարարել է «Ռոսօբոռոնէքսպորտ»-ի ներկայացուցիչ Իգոր Սևաստյանովը:
Ավելի վաղ Ռուսաստանը Պենտագոնի հետ ստորագրել է երեք պայմանագիր՝ Աֆղանստանի բանակի համար Ми-17В5 տիպի ավելի քան 70 ուղղաթիռ մատակարարելու համար:
Սևաստյանովի խոսքերով՝ ամերիկացի մի շարք բարձրաստիճան զինվորականներ իրենց հետ բանակցություններում հայտնել են, որ հաճույքով ռուսական ուղղաթիռներով կհամալրեին նաև ամերիկյան բանակի ստորաբաժանումները, եթե դա կախված լիներ միայն իրենցից:
