Ավստրալիան չի բացառում, որ կարող է արգելք դնել Ռուսաստանին ուրան վաճառելու վրա
Sky News հեռուստաալիքի փոխանցմամբ` Ավստրալիան դիտարկում է Ռուսաստանի դեմ նոր պատժամիջոցներ սահմանելու հարցը: Ավստրալիայի ֆինանսների նախարար Մաթիաս Կորմանը չի բացառել, որ կարող է արգելք դրվել Մոսկվային ուրանի վաճառքի վրա:
Նա հավելել է, որ իրենք խորապես քննարկելու են Ռուսաստանի դեմ պատժամիջոցների խստացման հարցը և միայն դրանից հետո կընդունեն որոշում: Օգոստոսի 8-ին ուրանի վաճառքի արգելքի մասին խոսել էր նաև Ավստրալիայի արտգործնախարար Ջուլի Բիշոպը:
Նա մասնավորապես զգուշացրել էր, որ Ռուսաստանի դեմ նոր պատժամիջոցներ կսահմանվեն, եթե Մոսկվան չստանձնի մալայզիական «Բոինգի» կործանման պատասխանատվությունը:
Ներկա դրությամբ Ավստրալիան արդեն իսկ երկու անգամ (մարտին և հունիսին) պատժամիջոցներ է սահմանել Ռուսաստանի ու Ուկրաինայի քաղաքացիների դեմ: Արգելվել է 62 ֆիզիկական անձանց մուտքն Ավստրալիա: Պատժամիջոցներն առնչվել են նաև 11 ձեռնարկության:
