Ռադիոակտիվ նյութ ներկրելու փորձի համար Վրաստանում ձերբակալվել են Հայաստանի քաղաքացիներ
Новости-Грузия լրատվական գործակալության փոխանցմամբ՝ վրացական հակահետախուզությունը կանխել է Հայաստանի երկու քաղաքացու կողմից ցեզիում-137 ռադիոակտիվ նյութի մուտքը երկիր: Այս մասին այսօր հայտնել է Վրաստանի ՆԳՆ-ի մամլո ծառայությունը:
Վերջինիս հաղորդմամբ՝ ռադիոակտիվ նյութը գտնվել է գործարանային արտադրության բեռնարկղում: Սակայն նյութի քանակի մասին ոչինչ չի հաղորդվել: Ռադիոակտիվ նյութ ներկրելու փորձի համար «Սադախլո» անցակետում ձերբակալվել են Հայաստանի քաղաքացիներ Սամվել Վ.-ն և Հարություն Խ.-ը:
Հարուցվել է քրեական գործ՝ Վրաստանի ՔՕ-ի 214-րդ հոդվածի 4-րդ կետով (մաքսային սահմանով թունավոր, ռադիոակտիվ կամ պայթուցիկ նյութերի տեղափոխում):
Բացի այդ, ձերբակալվածները մեղադրվում են Վրաստանի ՔՕ-ի 230-րդ հոդվածը խախտելու մեջ (ռադիոակտիվ մնացուկների կամ նյութերի ապօրինի ձեռք բերում, պահպանում, օգտագործում, վերամշակում և այլն):
