Անհրաժեշտ է անհապաղ կարգավորել Ղարաբաղյան հակամարտությունը. Դավութօղլու
Թուրքական Sabah թերթի փոխանցմամբ` Թուրքիայի արտգործնախարար Ահմեթ Դավութօղլուն ցավակցություն է հայտնել շփման գծում զոհված ադրբեջանցի զինծառայողների ընտանիքներին ու մերձավորներին:
Դավութօղլուն Իրաքի Թուրքմենական ճակատի առաջնորդ Էրշադ Սալիհիի հետ բանակցությունների արդյունքներով լրագրողների հետ ճեպազրույցում հիշեցրել է ադրբեջանցի 9 զինծառայողի զոհվելու մասին. «9 ադրբեջանցի զինվորի մահվան ցավը մնում է մեր սրտերում»: Դավութօղլուն ընդգծել է Ղարաբաղյան հակամարտության անհապաղ կարգավորման անհրաժեշտությունը:
Նա հավելել է, որ հեռախոսազրույց է ունեցել Ադրբեջանի արտգործնախարար Էլմար Մամեդյարովի հետ և նրան հայտնել, որ նման միջադեպերի պատճառն այն է, որ ցայժմ չի կարգավորվել Ղարաբաղյան հակամարտությունը: Դավութօղլուի խոսքերով` Թուրքիան մշտապես աջակցում է Ադրբեջանի տարածքային ամբողջականությանը:
