Թբիլիսյան դատարանը որոշել է հեռակա կարգով կալանքի տակ առնել Սաակաշվիլուն
Новости-Грузия լրատվական գործակալության փոխանցմամբ` Թբիլիսիի քաղաքային դատարանը որոշել է հեռակա կարգով կալանքի տակ առնել Վրաստանի նախկին նախագահ Միխեիլ Սաակաշվիլուն` դրանով իսկ բավարարելով դատախազության միջնորդությունը:
Նման որոշում է կայացվել նաև նույն գործով անցնող ևս երկու անձի նկատմամբ: Խոսքը գնում է Վրաստանի արդարադատության նախկին նախարար Զուրաբ Ադեիշվիլու և պաշտպանության նախկին նախարար Դավիթ Կեզերաշվիլու մասին: Նախկին նախագահի փաստաբան Օտար Կախիձեն խոստացել է բողոքարկել այդ որոշումը:
Վրաստանի դատախազությունը հուլիսի 28-ին քրեական գործ էր հարուցել Սաակաշվիլու դեմ` կապված 2007 թվականի նոյեմբերի 7-ին ընդդիմադիրների ցույցը բռնի ցրելու, «Իմեդի» հեռուստաընկերության վրա հարձակման և Արկադի (Բադրի) Պատարկացիշվիլու ունեցվածքը յուրացնելու հետ:
