ԱՄՆ-ն Աֆղանստանից իր գույքը կտեղափոխի Ադրբեջանի ու Վրաստանի երկաթուղիներով
Грузия Online-ի փոխանցմամբ՝ ԱՄՆ-ը ռազմական մատակարարումներ է իրականացնելու Ադրբեջանի երկաթուղիներով ու կառուցման փուլում գտնվող «Բաքու-Թբիլիսի-Կարս» (ԲԹԿ) երկաթուղով:
«Կովկասյան միջանցքը» մշակել են ամերիկացի զինվորականները՝ Աֆղանստանից իրենց գույքը (ռազմական տեխնիկա, սպառազինություն, հանդերձանք և մատակարարման առարկաներ) դուրս բերելու համար:
«Կովկասյան միջանցքը» նախատեսում է Աֆղանստանի Հերատ քաղաքից բեռների փոխադրում մինչև Կասպից ծովի ափ՝ Թուրքմենբաշի նավահանգիստ, որտեղից էլ դրանք լաստանավով կհասցվեն Բաքու, ապա երկաթուղային ճանապարհով կփոխադրվեն դեպի Բաթում (Վրաստան) կամ Թուրքիա:
Այդ ողջ ճանապարհին բեռնափոխադրումների համար ստեղծվելու են կուտակման կայաններ: Ռուս մասնագետները կարծում են, որ 2014 թվականի աշնանից մինչև 2016 թվականի ավարտն ամեն ամիս «Կովկասյան միջանցքով» փոխադրվելու է առնվազն 2200 բեռնարկղ ու տեխնիկայի միավորներ:
Մինչև ընթացիկ աշուն Բաքվի միջազգային ծովային նավահանգստում սկսելու է գործել լաստանավային նոր տերմինալ: ԲԹԿ-ն իր հերթին շահագործման է հանձնվելու 2015 թվականին: Օրեր առաջ էլ վերագործարկվել է Բաքվի ու Փոթիի միջև երկաթուղային ճանապարհով բեռնափոխադրումները:
