ՌԴ Գլխավոր շտաբը մալայզիական Boeing-ի կործանումից առաջ նրա մոտ ֆիքսել է ուկրաինական մարտական ինքնաթիռ
Ռուսական РИА Новости լրատվական գործակալության փոխանցմամբ՝ մալայզիական Boeing օդանավի աղետից առաջ նրանից 3-5 կիլոմետր հեռավորութան վրա նկատվել է ուկրաինական մարտական ինքնաթիռ:
Այս մասին լրագրողների հետ այսօրվա ճեպազրույցում հայտարարել է Ռուսաստանի զինված ուժերի Գլխավոր շտաբի օպերատիվ գլխավոր վարչության պետ, գեներալ-լեյտենանտ Անդրեյ Կարտապոլովը.
«Գրանցվել է երեք քաղաքացիական օդանավի, այդ թվում նաև մալայզիական ավիաուղիների Boeing 777-ի առկայություն: Միևնույն ժամանակ մենք այդ բարձրության վրա ֆիքսել ենք ուկրաինական ռազմաօդային ուժերի ինքնաթիռ, ենթադրաբար «Սու-25», որը գտնվել է Boeing 777-ից 3-5 կիլոմետր հեռավորության վրա»:
Ռուսական լրատվամիջոցը չի բացառում, որ ներկայումս կարող է կրկնված լինել 2001 թվականի սցենարը, երբ Ուկրաինան Սև ծովի երկնքում կործանեց ռուսական մարդատար օդանավ:
Այն ժամանակ Ուկրաինայի ՀՕՊ-ի զորքերը զորավարժության ժամանակ С-200 հրթիռային համալիրի հրթիռի միջոցով կործանել էին Թել Ավիվից Նովոսիբիրսկ մեկնող «Տու-154» ինքնաթիռը: Դրա հետևանքով զոհվել էր 78 մարդ, որոնց մեծ մասը (66 ուղևոր)՝ Իսրայելի քաղաքացիներ:
