Ի տարբերություն ՄՄ երկրների, ՀՀ-ում օրենսդրությունը շատ ավելի առաջադեմ է. Դեղարտադրողների միության տնօրեն
Դեղերի ոլորտում Մաքսային միության և Եվրամիության ստանդարտների միջև շատ մեծ տարբերություն կա: Այս մասին 168.am-ի հետ զրույցում ասաց Դեղարտադրողների և ներմուծողների միության գործադիր տնօրեն Սամվել Զաքարյանը:
Ըստ նրա` ՄՄ երեք անդամ հանրապետություններում դեռ գործում է խորհրդային տարիների «ԳՈՍՏ» հասկացողությունը: Զաքարյանի խոսքով` Եմ և ՄՄ համապատասխան փաստաթղթերի բովանդակության որակական առումով շատ մեծ տարբերություն չկա, ձևակերպումների խնդիր է, բայց քանի որ հավաստագրման պրոցեսը ԳՈՍՏ-ի դեպքում գոյություն չունի ու հավաստագրեր չեն տրվում, ԳՈՍՏ-ը չի ընդունվում միջազգային հանրության կողմից, ստացվում է, որ ՀՀ-ն պետք է ԳՈՍՏ-ին համապատասխանի, կամ ՄՄ երկրերը պետք է ընդունեն եվրոպական GMP-ն, որն ավելի բարձր է:
«Ընդհանրապես, ի տարբերություն ՄՄ երկրների, ՀՀ-ում օրենսդրությունը շատ ավելի առաջադեմ է և համապատախանում է ԵՄ չափանիշներին, այդ թվում դեղագործության ոլորտում»,- ասաց նա` հավելելով, որ ամեն դեպքում ՀՀ-ն հետքայլ չի անի: Նա տեղեկացրեց, որ դեղերի մասով հատուկ բանակցություններ են վարվելու ՄՄ հետ, որ այդ մասով ՀՀ-ն չնահանջի, այլ իրենք առաջ գան. «Վատագույն դեպքում 2 ձևն էլ կընդունվեն` ԵՄ հավաստագիրը կմնա և կունենանք ԳՈՍՏ»:
Այդ դեպքում, ըստ Զաքարյանի, արտադրողների համար հավելյալ քաշքշուկներ չեն սպասվում, եթե ընկերությունն արդեն անցել է եվրոպական գործընթացները:
Ի դեպ, նա հայտնեց, որ հայկական դեղարտադրող «Արփիմեդ» ընկերությունը շուտով GMP արտոնագիր կստանա, իսկ մինչև տարվա վերջ հավաստագրեր կստանան նաև «Մեդիքլ» և «Ֆարմատեք» ընկերությունները:
