Ուկրաինան ԱՄՀ-ից երկրորդ տրանշը կստանա մինչև սեպտեմբեր
Ռուսական ИТАР-ТАСС լրատվական գործակալության փոխանցմամբ՝ Արժույթի միջազգային հիմնադրամը (ԱՄՀ) պատրաստվում է Կիևին հատկացնել երկրորդ տրանշը՝ 1.4 միլիարդ դոլար: Այս մասին հայտարարել է Ուկրաինայում ԱՄՀ-ի առաքելության ղեկավար Նիկոլայ Գեորգիևը:
Նրա խոսքերով՝ այդ միջոցներն Ուկրաինային կհատկացվեն մինչև սեպտեմբեր: ԱՄՀ-ի տնօրենների խորհուրդն առաջիկա մի քանի շաբաթվա ընթացքում դիտարկելու է Ուկրաինայի հետ հետագա համագործակցության ծրագիրը:
ԱՄՀ-ն ապրիլի վերջին հաստատել էր Ուկրաինայի համար վարկային ծրագիրը, որն ընդհանուր առմամբ նախատեսում է Ուկրաինային հատկացնել 17.1 միլիարդ դոլար: Առաջին տրանշը՝ 3.2 միլարդ դոլար, Կիևը ստացել է մայիսին:
Հիշեցնենք, որ սրանից առաջ Ռուսաստանի նախագահ Վլադիմիր Պուտինը հայտարարել էր, թե ԱՄՀ-ը պետք է դադարեցնի Ուկրաինային վարկեր տրամադրելը:
