Մուսուլմանական երկրները պետք է գիտակցեն իրենց սխալներն ու ուղղեն դրանք. Գյուլ
Թուրքական TRT Haber հեռուստաալիքի փոխանցմամբ՝ Թուրքիայի արտգործնախարար Ահմեթ Դավութօղլուն հայտարարել է, որ Իսրայելն օգտվել է իսլամական աշխարհի պառակտումից և ռազմական գործողություններ է սկսել պաղեստինցիների դեմ:
Դավութօղլուի խոսքերով՝ իսլամական աշխարհը չպետք է լռություն պահպանի Իսրայելի ագրեսիայի առջև: Դավութօղլուն հավելել է, որ Անկարան ափորձում է հասնել Մերձավոր Արևելքի տարածաշրջանում վերջնական խաղաղության հաստատմանը:
Թուրքիայի նախագահ Աբդուլլահ Գյուլն իր հերթին հայտարարել է, որ իսլամական աշխարհն ամաչում է այն իրադարձություններից, որոնք ներկայումս տեղի են ունենում մուսուլմանական երկրներում, քանի որ հենց այդ երկրներում են մուսուլմանները սպանում միմյանց:
Գյուլն ափսոսանք է հայտնել, որ մուսուլմանական երկրներում չեն ձեռնարկում իրենց տարածքներում առկա հակամարտությունների կարգավորման ուղղությամբ քայլեր: Գյուլն ընդգծել է, որ ներկայումս մուսուլմանական երկրներում տեղի ունեցող իրադարձություններն իրականում հեռու են իսկական իսլամից.
«Մուսուլմանական երկրները պետք է գիտակցեն իրենց սխալներն ու ուղղեն դրանք: Իսլամը՝ որպես աշխարհի կրոններից մեկը, որևէ ընդհանուր բան չունի ահաբեկչության հետ»:
