Ինտերպոլն ավիաաղետի կապակցությամբ փորձառու մասնագետների խումբ է ուղարկելու Ուկրաինա (տեսանյութ)
Ուկրաինական UNIAN լրատվական գործակալության փոխանցմամբ՝ Ինտերպոլն Ուկրաինա է ուղարկելու փորձառու մասնագետների խումբը, որը կօգնի պարզել Դոնեցկի մարզում մալայզիական Boeing-777 օդանավի կործանման հանգամանքները: Այս մասին հայտնել է Ուկրաինայի ՆԳՆ-ի մամլո ծառայությունը:
Վերջինիս հաղորդմամբ՝ Ուկրաինայի ներքին գործերի նախարար Արսեն Ավակովը հեռախոսազրույց է ունեցել Ինտերպոլի գլխավոր քարտուղար Ռոնալդ Նոուբլի հետ, որի ժամանակ քննարկել է ավիաաղետի հետաքննման հարցում համագործակցության հնարավորությունը:
Հեռախոսազրույցի արդյունքներով կողմերը պայմանավորվել են, որ Ինտերպոլն անհապաղ փորձառու մասնագետների խումբ է ուղարկելու Ուկրաինա:
