Կահիրեում ձերբակալել են Եգիպտոսի նախկին նախագահի որդուն
Եգիպտական МЕНА լրատվական գործակալության փոխանցմամբ՝ Կահիրեի իրավապահ մարմինների աշխատակիցներն այսօր ձերբակալել են Եգիպտոսի նախկին նախագահ Մուհամմեդ Մուրսի որդի Աբդուլլահին: Փախուստի մեջ գտնվող 19-ամյա Աբդուլահին ձերբակալել են Կահիրեի հարավում գտնվող երկաթուղային կայարանում:
Ոստիկանությունն Աբդուլլահին ու նրա ընկերոջը ձերբակալել է մարտի 1-ին, ինչը տեղի էր ունեցել այն բանից հետո, ինչ նրանց ավտոմեքենայում հայտնաբերվել էր հաշիշ: Հաջորդ օրը երիտասարդներին ազատ էին արձակել, քանի որ նրանք համաձայնվել են փորձաքննության համար անալիզ ներկայացնելուն: Անալիզը դրական արդյունք էր տվել:
Հուլիսի 2-ին եգիպտական դատարանը Աբդուլլահ Մուրսիին ու նրա ընկերոջը հեռակա կարգով մեղավոր ճանաչեց հաշիշ պահելու և օգտագործելու մեջ և երկու երիտասարդին էլ դատապարտեց մինչև 1 տարվա ազատազրկման: Նրանց նաև տուգանեցին 10.000 եգիպտական ֆունտով (մոտ 1400 դոլար):
