Իրանի միջուկային ծրագրի շուրջ համապարփակ համաձայնագրի մշակման ժամկետը կարող է երկարաձգվել մինչև նոյեմբեր
Ռուսական РИА Новости լրատվական գործակալության փոխանցմամբ՝ Իրանի ու «Վեցյակի» միջև իրանական միջուկային ծրագրի շուրջ համաձայնագրի նախապատրաստման ժամկետը կարող է երկարաձգվել մի քանի ամսով: Չի բացառվում, որ այդ ժամկետը երկարաձգվի մինչև նոյեմբեր:
Այս մասին այսօր հայտնել է իրանական պատվիրակությունում առկա աղբյուրը: Նախօրեին արևմտյան դիվանագիտական աղբյուրն արդեն իսկ հայտնել էր, որ մեծ հավանականություն կա, որ երկարաձգվի Իրանի միջուկային ծրագրի վերաբերյալ համաձայնագրի մշակման ժամկետը:
Իրանի արտգործնախարար Մոհամմադ Ջավադ Զարիֆը երեկ ամփոփելով ԱՄՆ պետքարտուղար Ջոն Քերիի հետ եռօրյա բանակցությունները, չէր բացառել, որ եթե կողմերը չկարողանան մինչև հուլիսը համաձայնեցնել փաստաթղթի նախագիծը, ապա այդ ժամկետը կարող է երկարաձգվել մինչև նոյեմբեր:
