Ռումինիան վավերացրել է ԵՄ-ի ու Վրաստանի միջև ստորագրված Ասոցացման համաձայնագիրը
Новости-Грузия լրատվական գործակալության փոխանցմամբ՝ Ռումինիան դարձել է ԵՄ-ի անդամ առաջին երկիրը, որը վավերացրեց ԵՄ-ի ու Վրաստանի միջև Ասոցացման համաձայնագիրը: Այս մասին լրագրողների հետ այսօրվա զրույցում հայտարարել է Վրաստանի արտգործնախարար Մայա Փանջիկիձեն:
Փանջիկիձեն երախտագիտություն է հայտնել Ռումինիայի իշխանություններին՝ Վրաստանին աջակցելու համար: Վրաստանն ու ԵՄ-ն Ասոցացման համաձայնագիրը ստորագրել են այս տարվա հունիսի 27-ին, Բրյուսելում: Ուժի մեջ մտնելու համար անհրաժեշտ է, որ այն վավերացնեն Վրաստանի խորհրդարանը, Եվրախորհրդարանը և ԵՄ-ի անդամ երկրների խորհրդարանները:
Վրաստանի խորհրդարանի՝ իրավական հարցերով հանձնաժողովի նախագահ Վախթանգ Խմալաձեն հայտարարել է, որ Վրաստանի խորհրդարանը ԵՄ-ի հետ Ասոցացման համաձայնագիրը վավերացնելու է հուլիսի վերջին:
