Ուկրաինացի զինվորականները վերահսկում են Դոնբասի 2/3-ը
Интерфакс-Украина-ի փոխանցմամբ՝ հակաահաբեկչական գործողության ուժերն իրենց վերահսկողության տակ են վերցրել Ուկրաինայի արևելքում հակաահաբեկչական գործողության գոտում գտնվող 36 շրջանից 23-ը:
Այս մասին Կիևում լրագրողների հետ ճեպազրույցում հայտարարել է Ուկրաինայի ազգային անվտանգության ու պաշտպանության խորհրդի քարտուղար Անդրեյ Պարուբին:
Նրա խոսքերով՝ զինյալների ակտիվությունը նվազել է, ոչնչացվել է նրանց տեխնիկան: Նա չի բացառել, որ Դոնեցկի ու Լուգանսկի մարզերում կարող է մտցվել ռազմական դրություն:
Պարուբին հերքել է Ուկրաինայի հետ սահմանից ռուսական զորքերի հետ քաշվելու մասին տեղեկատվությունը: Նրա տվյալներով՝ ներկայումս սահմանի մոտ գտնվում է մինչև 40.000 ռուս զինծառայող: Պարուբին հավելել է, որ Ռուսաստանից հումանիտար օգնության տեսքով զենք է ուղարկվում զինյալներին:
