Մուրսիի կրտսեր որդուն ազատազրկման են դատապարտել թմրանյութեր պահելու և օգտագործելու համար
MENA (Middle East News Agency) լրատվական գործակալության փոխանցմամբ՝ Եգիպտոսի նախկին նախագահ Մուհամմեդ Մուրսիի կրտսեր որդի, 20-ամյա Աբդուլլահ Մուրսիին երեկ դատապարտել են մեկ տարվա ազատազրկման՝ թմրանյութեր պահելու և օգտագործելու համար:
Ոստիկանությունն այս տարվա մարտին Կահիրեի արևելյան ծայրամասում ձերբակալել էր Աբդուլլահին ու նրա ընկերոջը՝ կասկածելով հաշիշ օգտագործելու մեջ: Մուրսիի կրտսեր որդու ընկերը, որին ձերբակալել էին նրա հետ միասին, նույնպես դատապարտվել է մինչև մեկ տարվա ազատազրկման:
Նախկին նախագահի ընտանիքի անդամների կարծիքով՝ Աբդուլլահն անմեղ է: Նրանք կարծում են, որ ներկայիս իշխանություններն այդ կերպ փորձում են մթագնել իրենց ընտանիքին, իսկ դատարանի տվյալ որոշումը հանդիսանում է իսլամիստներին վարկաբեկելու կամպանիայի մի մասը:
