Վախճանվել է ակադեմիկոս Գրիգոր Գուրզադյանը
2014 թ. փետրվարի 22-ին, կյանքի 92-րդ տարում վախճանվել է ականավոր գիտանական, աստղաֆիզիկոս, Հայաստանի Գիտությունների ազգային ակադեմիայի ակադեմիկոս Գրիգոր Արամի Գուրզադյանը:
Լինելով Բյուրականի աստղադիտարանի հիմնադիր կազմում` նա գլխավորեց աստղաֆիզիկայում հրթիռային տեխնիկայի կիրառության հետազոտությունները: Նրա անվան հետ է կապված աշխարհում առաջին արբանյակային աստղադիտարանների ստեղծումը։
Նրա ղեկավարությամբ են նախաթռիչքային պատրաստում անցել տասնյակ տիեզերագնացներ: Լայն հասարակությանը հայտնի են նրա փիլիսոփայական էսսեների գրքերը նվիրված գիտությանը, արվեստին, ճարտարապետությանը: Պարգեւատրվել է Սբ Մեսրոպ Մաշտոցի շքանշանով:
ՀՀ վարչապետի որոշմամբ ստեղծվել է կառավարական հանձնաժողով` ՀՀ ԿԳ նախարար Ա. Աշոտյանի գլխավորությամբ: ՀՀ կրթության եւ գիտության նախարարությունը ցավակցում է Գուրզադյանների ընտանիքին եւ հարազատներին:
