Վլադիմիր Գասպարյանը ներկայացրել է, թե ինչպիսին պետք է լինի ընդհանրապես ոստիկանի աշխատանքը քաղաքացու հետ (տեսանյութ)
Փետրվարի 19-ին ոստիկանության պետ, գեներալ-լեյտենանտ Վլադիմիր Գասպարյանը մարզային այցերի ծրագրով Արարատի մազում էր և աշխատանքային խորհրդակցություն անցկացրեց ոստիկանության մարզային վարչությունում: Վլադիմիր Գասպարյանը ներկայացրեց ոստիկանության համակարգի բարեփոխումների ընթացիկ փուլի պահանջները և նշեց, որ ոստիկանության ղեկավարության առաջադրած սկզբունքներն ընդհանրական են բոլոր տարածաշրջանների համար՝ ոստիկանական ծառայության հետ անհամատեղելի երևույթների բացառում, կանխարգելիչ աշխատանքների ակտիվացում, հանցագործությունների բացահայտման արդյունավետության ապահովում, ոստիկանության ծառայողի ներքին վերափոխում, աշխատանք քաղաքացիների հետ՝ հիմնվելով հասարակություն-ոստիկանություն կապի ամրապնդման վրա:
Վերլուծելով մարզային վարչության ու ենթակա ստորաբաժանումների գործունեությունը՝ ոստիկանության պետն ընդգծեց երիտասարդ կադրերի հետ հետևողական աշխատանքի, համայնքային ոստիկանության ծառայության նոր որակի ապահովման, հասարակությանը սպասարկող ծառայությունների աշխատանքի արմատական բարեփոխման անհրաժեշտությունը: Քննչական ծառայության օրինակով՝ Վլադիմիր Գասպարյանը ներկայացրեց, թե ինչպիսին պետք է լինի ընդհանրապես ոստիկանի աշխատանքը քաղաքացու հետ: Ոստիկանության պետը խորհրդակցության մասնակիցների ուշադրությունը հրավիրեց հատկապես անչափահասների հիմնախնդիրներին` նշելով, որ իրավապահ գործունեության այդ ոլորտն այսօր ընդգրկում է նաև աշխատանքն անբարենպաստ ընտանիքների, ուսումնական հաստատությունների, զորակոչիկների, նաև՝ հետզորակոչային տարիքի պատանիների հետ:
Ոստիկանության պետը, ելնելով տարածքի առանձնահատկություններից, խորհրդակցության մասնակիցներին հրահանգեց ավելի սերտորեն աշխատել գյուղացու հետ, լինել սրտացավ, որպես գյուղացու հոգսը կիսող մասնակցել նրա խնդիրների լուծմանը: Խորհրդակցության ավարտին Վլադիմիր Գասպարյանը մասնակիցներին տվեց աշխատանքների բարելավմանն ուղղված կոնկրետ ցուցումներ ու հանձնարարականներ: Այնուհետև ոստիկանության պետը Արարատի մարզպետարանում հանդիպում ունեցավ համայնքների ղեկավարների հետ՝ ներկայացնելով իր այցի նպատակը, ոստիկանության ծրագրերը և տեղական ինքնակառավարման մարմինների խնդիրները իրավապահների հետ համագործակցության ոլորտում:
ՀՀ ոստիկանություն
