Տուժողի կինը և միաժամանակ գործով վկան անտեղյակ էր. «Փաստինֆո»
Խոշոր չափերով խարդախության փորձի ու առանձնապես խոշոր չափերով կաշառք տալու փորձին դրդելու գործով այսօրվա դատական նիստում հարցաքննվեցին տուժող Գարեգին Շահինյանը և նրա կինը՝ վկա Գոհար Սաֆարյանը: «Փաստինֆոյի» փոխանցմամբ՝ Երևանի Կենտրոն և Նորք Մարաշ վարչական շրջանների ընդհանուր իրավասության դատարանը, նախագահությամբ Մնացական Մարտիրոսյանի, նախորդ դատական նիստում տուժողին բերման ենթարկելու որոշում էր կայացրել:
Տուժողի կինը դատարանին տեղեկացրել էր, որ ամուսինը աշխատանքի բերումով գտնվում է Կոտայքի մարզում և հայտնի չէ, թե երբ է վերադառնալու: Տուժող Գարեգին Շահինյանը դատարանում պնդեց իր նախաքննական մարմնին տված ցուցմունքները և հայտնեց, որ այն ժամանակ ավելի լավ էր հիշում, քան ներկայումս:
Դատարանում նա նշել է, թե տեղյակ չէ, թե իր որդու նկատմամբ խափանման միջոց ընտրված կալանքը փոփոխելու համար պահանջված 2000 դոլար սկզբնական գումարն ամբաստանյալն ում պետք է փոխանցեր: Գարեգին Շահինյանի կինը՝ վկա Գոհար Սաֆարյանն էլ նշել է, որ 2013թ. օգոստոսին իր որդին փողոցում վիճաբանել է, ոստիկանները ձերբակալել են նրան և բերման ենթարկել բաժին, իսկ ամուսինը իրեն տեղեկացրել է, որ որդուն բաց չեն թողնում:
Սակայն օգոստոսի 25-ին ամուսինը կնոջն ասել է, որ իրենց հարևան Մհերը կօգնի որդուն ազատ արձակվելու հարցում: Ըստ վկայի, ինքն այլ մանրամասներ չգիտի, քանի որ վատառողջ է եղել ու ամուսինը ամեն բան իրեն չի ասել, որպեսզի չանհանգստանա: Վկան միաժամանակ նշեց, որ տեղյակ է եղել, որ ամուսինը 2000 ԱՄՆ դոլար պետք է տա իրենց հարևան Մհերին, որպեսզի որդուն ազատեն, սակայն իրենք այդ գումարը չեն տվել, քանի որ չեն ունեցել:
Ամբողջությամբ կարող եք կարդալ սկզբնաղբյուր կայքում:
