«Ի՞նչ է սա, եթե ոչ գազային ախմախություն». Նիկոլ Փաշինյան
ԱԺ պատգամավոր, ՀԱԿ խմբակցության անդամ Նիկոլ Փաշինյանը ֆեյսբուքյան իր էջում անդրադարձել է ԵԿՄ համագումարում Հայաստանի նախագահ Սերժ Սարգսյանի` գազի գնի վերաբերյալ պարզաբանումներին.
«Սերժ Սարգսյանը ԵԿՄ համագումարում ասում է, թե քննարկումների ժամանակ ոչ ոք կասկածի տակ չի դրել Ռուսաստանից ստացվող գազի գնի շահեկան լինելը:
ԱԺ-ում ասել եմ, հիմա էլ եմ կրկնում. Պետական եկամուտների կոմիտեի հրապարակած տվյալներով՝ Իրանից Հայաստան մուտք գործող գազի հազար խորանարդ մետրը սահմանին արժե 181 դոլար:
Մինչդեռ Հայաստանն իրանական գազը չի գնում սեփական կարիքների համար եւ այդ նպատակով գազ է ներմուծում Ռուսաստանից, որը սահմանին արժե 189 դոլար՝ հազար խորանարդ մետրի դիմաց:
Այսինքն՝ ռուսական գազը ութ դոլարով թանկ է իրանական գազից:
Ընդ որում, Հայաստանը նման «զեղչի» հասել է «Հայռուսգազարդի» 20 տոկոս բաժնեմասը Ռուսաստանին հանձնելով:
Մաքսային միությանն անդամագրվելը եւ գազային տխրահռչակ պայմանագիրն էլ Հայաստանին կարող են տասնյակ տարիներով զրկել Իրանից ավելի էժան գազ ներմուծելու հնարավորությունից:
Ի՞նչ է սա, եթե ոչ գազային ախմախություն»:
