Արարատի մարզպետարանի աշխատակիցները կարող են փակել Արարատ-Երևան ճանապարհը՝ բողոքելով 5%-ների դեմ
«Ընդդեմ կենսաթոշակային պարտադիր վճարումների» նախաձեռնության տեղեկություններով` Արարատի մարզպետարանի ենթակայության տակ գտնվող ձեռնարկություններում կատարվել են կենսաթոշակային պարտադիր պահումներ: 168.am-ի հետ զրույցում նախաձեռնության անդամ Հայկ Գևորգյանը դա գնահատեց որպես ՀՀ Սահմանադրության, «Իրավական ակտերի մասին» ՀՀ օրենքի և ՍԴ որոշման կոպիտ խախտում, եթե այն կատարվել է առանց աշխատողների համաձայնության:
«Պահանջում ենք հետ վերադարձնել աշխատակիցներից ապօրինաբար պահված գումարները, այլապես մարզպետարանը հայտնվելու է լուրջ սոցիալ-քաղաքական խնդիրների առաջ, քանի որ աշխատողները ակնհայտ դեմ են այդ պահումներին և պատրաստ են իրենց բողոքի ձայնը բարձրացնել նաև հանրային ակցիաների ձևով, այդ թվում՝ Արարատ-Երևան ճանապարհը արգելափակելու եղանակով: Եթե այս հարցի շուրջ մարզպետարանը մի քանի օրվա ընթացքում լուծում չառաջարկի, ապա մենք կսկսենք մեր քայլերի իրականացումը»,- ասաց Հ. Գևորգյանը:
